Hyppää sisältöön
Valtioneuvosto ja ministeriöt Media

Anna-Maja Henriksson: Rasismm da vâjjõs-saakk kuõskte še säʹmmlaid

Oikeusministeriö 5.2.2021 11.17

Noorõõđim mõõnni skamm-mannust Taarr da Ruõcc kollegai da koolm riikk Sääʹmtiiʹǧǧi saaǥǥjååʹđteeʹjivuiʹm saǥstõõllâd ääiʹjpoddsaž säʹmmlaid kuõskteei aaʹšši pirr.

Šiõǥǥ narodkõõski õõuʹdummšest da vâjjõs-saaǥǥ vuâsttlâsttmõõžž pirr šõõddi jõnn saǥstõõllmõš. Meeʹst leäi nâânn õhttsaž vueiʹnelm ääʹššest. Tuʹmmiim såbbrest ǩieʹssed õʹhtte vuârrsaǥstõõllmõõžž ääʹšš pirr. Suåvim, što raajjâp teemast õhttsaž ǩeeʹrjtõõzz, kååʹtt lij õiʹdde õlmstõttum. 

Vâjjõs-saakk lij säʹmmlai årra še ääiʹjpoddsaž kõõččmõš. Ruõccjânnam ââʹlmõs vuõiggâz 23.1.2020 uʹvddem Girjas sääʹmõutstõõzz kuõskki suudâm mâŋŋa veezz Sääʹmjânnam lij õlmmnam äšttmõš, vâjjõs da joba viõkkväʹldd. Tâʹvv-Taarrjânnmest lie leämmaž mäŋgg äʹššed, koin lij ravvsânji loŋŋtum säʹmmlai vuâstta. Sääʹmteʹǧǧ lij ceälkkam, što Lääʹddjânnmest vâjjõs-saakk säʹmmlai vuâstta kuâsttai aainâs sosiaalʼlaž mediast. 

Eettmõš kuâsttai pirr maaiʹlm. Alggmeer pirr maaiʹlm jåuʹdde heâmmeem da seänǩaneʹsvuõđ vuâlla, aainâs ko kõõččmõš lij maddu da luâttvääraid kuulli jeeʹresmiõllsažvuõđin. 

Rasiism da vâjjõs-saaǥǥ jeät vuõittu priimmâd, ij-ǥa tõn rääʹj vueiʹt mõõnnâd vuõʹljid puʹšttleeʹl. Jeeʹresnallšem vueiʹnelm da saǥstõõllmõš koʹlle demokraattlaž õhttsažkådda. Nuuʹbb meer vueʹleei saakk leʹbe äšttmõõžž eʹpet jie kuul.

Vuõiggâdvuõttministeria lij tuejjääm vâjjõs-saaǥǥi da vâjjõsreäkkõõzzi vuâsttsaž õõuʹdeemtuâj määŋg eeʹjj ääiʹj. Säʹmmlaid jurddum materiaal vâjjõsreäkkõõzzin da tõi tobdstummšest lij valmštõõvvmen ǩeâđđa. Vâjjõsreäkkõõzzin iʹlmmtummuš lij vääžnai, što tõid vueiʹtet kässjõõttâd da tuäiv mieʹldd še cõggâd seämmanallšem reäkkõõzzid puõʹttivuõđâst. Iʹlmmtummuš vieʹǩǩat še raajjâd obbkoov eettmõõžžâst.

Meeʹst juõʹǩǩkaž feʹrttai muʹštted, što pukin lij seämma ooumažärvv. Leäʹp oummu, ǩeäin lie tobddi. Mij leäʹp še neuʹrrõõvvi. Tõn diõtt lij samai tääʹrǩes äʹšš tuõʹllʼjed vâjjõs-saaǥǥid da heâmmõõzz meädda. Juõʹǩǩka tuâj taarbšet. Säʹmmlain lij vuõiggâdvuõtt tobddâd jiiʹjjes primmum da vuäzzliʹžžen õhttsažkååʹddest.

Täi saaʹnivuiʹm tuäivtam pukid samai šiõǥǥ saaʹmi meersažpeeiʹv! Buori sámi álbmotbeaivvi buohkaide! Pyeri säämi aalmugpeivi puohháid!

------------------
Anna-Maja Henriksson, vuõiggâdvuõttminister
 

Sivun alkuun