Sämmilij jiešmeridemvuoigâdvuotâ já jiešhaldâšem nanosmeh

- Ovdâskoodán lii onne adelum tehálâš lahâiävtuttâs. Tain uđâsmitmijn Suomâ västidičij aalmugijkoskâsij olmoošvuoigâdvuođâid koccee orgaanij kritiikân sämmilij vuoigâdvuođâi luávkkámijn, turviiččij puátteevuođâst ollásávt sämmilij vuáđu- já olmoošvuoigâdvuođâid sehe visásmitáččij sämikulttuur eellimvuáimálâšvuođâ siäilum, iätá riehtiminister Anna-Maja Henriksson.

Suomâ vuáđulaavâ mield sämmilijn lii päikkikuávlustis kielân já kulttuurân kyeskee jiešhaldâšem. Sämitigge oovdâst sämmilijd jieijâs pargoid kullee aašijn. Tááláš sämitiggelaahâ lii ivveest 1995 já lii eereeb iärrás valjáid lohtâseijee njuolgâdusâi uásild puárásmum. Suomâ lii meid finnim láittusijd OA olmoošvuoigâdvuođâid koccee orgaanijn sämmilij aalmuglâš- já poolitlij vuoigâdvuođâi luávkkáámist.

Iävtuttâs huápulumos ulmen lii-uv sämmilij jiešmeridemvuoigâdvuođâ nanodem sehe valjâluvâttâlmân merkkiimân kyeskee hinái uđâsmittem. Sämmilij vuoigâdvuotâ algâaalmugin jieš meridiđ jieijâs jiešhaldâšemorgaan ráhtusijd nanoduvvoo. Puátteevuođâst valjâluvâttâllâm uásild lii koččâmuš tuš vuoigâdvuođâst jienâstiđ já asâttuđ iävtukkâssân Sämitige vaaljâin ige tast, ete kiäm puáhtá anneeđ sämmilâžžân. Njuolgâdus västid ennuv ive 2017 algâlávt nannejum tave-eennâmlii sämisopâmuš miärádâs Sämitige jienâstemluvâttâlmist. Jiečânâs já sorjomettum nubástusuuccâmlävdikodde toimâččij vuossâmuš nubástusuuccâmtäässin valjâluvâttâlmân kyeskee aašijn. Lasseen jienâstem sämitiggevaaljâin tahhoo älkkeebin sierâ vuovijguin. 

Eres teháliih iävtuttâsah:

• Virgeomâhái ráđádâllâmkenigâsvuotâ nanoduvvoo
• Sämmilij vuoigâdvuođâi huámmášumán väldimist virgeomâhái tooimâst asâttuvvoo tärhibeht
• Sämitige toimâväldinjuolgâdus ovdeduvvoo já laavâ tárguttâsciäkán lasettuvvoo čujottâs sämmilij jiešmeridemvuoigâdvuotân
• Kyehtčyetvittlov jienâvuoigâdvuođâlâš sämmilâžžâd puáhtá puátteevuođâst toohâđ alguu Sämitiigán ton pargoid kullee ääšist. 

Iävtuttâs lii uási Sanna Marin haldâttâs ohjelm já tot lii valmâštâllum riehtiministeriö jođettem toimâkoddeest, moos meid Sämitigge uásálistij. Iävtuttâs olášume maŋa Suomâ lahâasâttem lii oovtnálásâš aalmugijkoskâsij olmoošvuoigâdvuotâsopâmušâiguin já váldá huámmášumán aalmugijkoskâsii rievti tääsist majemui ihelovoi ääigi tábáhtum ovdánem. Iävtuttâs vuolgâttuvvoo vala meid Sämitiigán tuhhiittemnáál. 

Lii tárguttâs, ete laavah puátih vuáimán ive 2023, mutâ uđđâ valjânjuolgâdusâid iä kiergân heiviittiđ vala ive 2023 sämitiggevaaljâin.

Iävtuttâs tuhhiittii jienâiguin 11 - 3. Minister Kurvinen kuođij iävtuttâsân sierâuáivil, moos ministereh Lintilä já Kaikkonen seerváin.

Lasetiäđuh: Ráđádâllee virgeolmooš Yrsa Nyman, p. 0295 150 293, ovdânommâ.suhânommâ@gov.fi

Hahâsijđo: https://oikeusministerio.fi/hanke?tunnus=OM002:00/2020

Uđđâsân lii tievâsmittum 17.11.2022 tme 16.55 tiätu jienâstempuátusist.