Buori sámi álbmotbeaivvi, buori eamiálbmotgielaid jagi!
Sápmelaččain daddjojuvvo dávjá, ahte sii leat njealji riikka álbmot Suomas, Ruoŧas, Norggas ja Ruoššas. Álbmotbeaivinai dollojuvvo jagi 1917 Troanddimis dollojuvvon sámi čoakkáma beaivve 6.2., daningo dalle šihttojuvvui riikkarájiid rasttildeaddji ovttasbarggus sápmelaččaid gaskka.
Jagi 2019 ávvuduvvo ON:a riikkaidgaskasaš eamiálbmotgielaid jahki. Eamiálbmogiid gielat leat árvvoštallojuvvon leat 6700, ja dain 40 proseantta leat árvvoštallojuvvon uhkivuložin. Gielaid ja kultuvrraid riggodat ja nuppe dáfus uhkki daid jáddamis leat áigeguovdilis gažaldagat Davviriikkainnai.
Suoma vuođđolágas lea dorvvastuvvon sápmelaččaide eamiálbmogin vuoigatvuohta bajásdoallat ja gárgehit iežaset giela ja kultuvrra. Ruovttuguovllus sápmelaččain lea gielaset ja kultuvrraset iešstivren, man várás válljejuvvo válggain njealji jagi gaskkaid sámediggi. Sámiid ruovttuguovlu gokčá Anára, Eanodaga ja Ohcejoga gielddaid sihke Soađegili gieldda davvioasi.
Riekteministeriijas ávvudit ON:a eamiálbmotgielaid jagi barggu olis. Válmmaštallat dieđihančállosa sápmelaččaid gielalaš vuoigatvuođain. Lágidit sihke Helssegis ja ruovttuguovllus eiseválddiide skuvlema. Atnit fáddájagi ávkin kommunikašuvnnasteamet. Dán barggus sámediggi lea buhttemeahttun áššedovdi ja ovttasbargoguoibmi.
Ráhkadeimmet álbmotbeaivvi ávvudeapmin smávva diehtogilvvoža, man ulbmilin lea lasihit dieđu sápmelaččain ja sámegielain. Diehtogilvu lea čuozihuvvon suoma- ja ruoŧagielagiidda, man dihte dat lea gárvvistuvvon suoma- ja ruoŧagillii. Diehtogilvvu sisdollui sáhttá oahpásnuvvat maid sámegielaid mielde. Buori sámi álbmotbeaivvi, buori álgoálbmotgielaid jagi!
Lassidieđut: Ráđđádalli virgeolmmoš Johanna Hautakorpi, vuoigatvuođaministeriija, tel. 02951 50018, [email protected]
Diehtogilvu (suomagillii)
Diehtogilvu (ruoŧagillii)
Diehtogilvvu jorgalus davvisámegillii
Hálidatgo diehtit lasi?
Ruovtteatnan gielaid guovddáš (suomagillii)
ON:a eamiálbmotgielaid jahki (eŋgelasgillii)