Hyppää sisältöön
Stáhtaráđđi ja ministeriijat Media

Anna-Maja Henriksson: Raasiism já vajesaahâ kyeskih meid sämmiláid

Oikeusministeriö 5.2.2021 11.11

Mij čokkânijm moonnâm skammâmáánu Taažâ já Ruotâ virgekuoimijguin já kuulmâ staatâ sämitiigij saavâjođetteijeiguin savâstâllâđ äigikyevdilis sämmiláid kyeskee aašijn.

Šiev aalmugkoskâvuođâi oovdedmist já vajesaavâ vuástálistmist šoodâi livkkáás savâstâllâm. Mist lâi noonâ ohtsâš uáinu ääšist. Mij meridijm čuákkimist savâstâllâđ tävjibeht ääšist. Mij soovâim, ete rähtip teemast ohtsii čalluu, mii almostui kieskâd. 

Vajesaahâ lii sämmilij-uv peht vaidâlitteht äigikyevdilis koččâmuš. Ruotâ alemuu rievti 23.1.2020 julgáštem Girjas siijdân kyeskee tuámu maŋa oles Sämieennâm kuávlust lii lamaš aštâččâm, vaje já joba viehâväldi. Tave-Taažâst láá lamaš maaŋgah tábáhtusah, main láá tuođâlávt kihtem sämmilij vuástá. Sämitigge lii muštâlâm, ete Suomâst vajesaahâ sämmilij vuástá tiättoo eromâšávt sosiaallii mediast. 

Almoon kuáská oles maailmân. Algâaalmugeh kärttih pirrâ maailm hemâdem já soováášmettumvuođâ čuosâttâhhân, eromâšávt ko lii koččâmuš enâmân já luánduriggoduvváid lohtâseijee sierâmielâlâšvuođâin. 

Mij ep koolgâ tuhhiittiđ raasiism já vajesaavâ, epke pyevti leđe peerusthánnáá tain. Sierâlágán uáivileh já savâstâllâm kuleh demokraatlii ohtsâškoodán. Nube aalmug huánnoo sárnum teikâ uhkedem vuod ij kulluu.

Riehtiministeriö lii toohâm vajesaavâ já vajerikosij vuástásâš ovdedempargo jo maaŋgâ ive. Sämmiláid čuosâttum materiaal vajerikosijn já toi tubdâmist lii valmâštuumin kiđđuv. Vajerikosijn almottem lii tehálâš, vâi toid puáhtá tarvaniđ já tuáivu mield meid estiđ siämmáálágánijd rikosijd puátteevuođâst. Almottem iššeed meid hammiđ oleskove almonist.

Juáháš mist kalga mušteđ, ete juáhháást lii siämmáš olmoošárvu. Mij lep ohtâgâsah, kiäin láá tobdoh. Mij lep meid háváduvááh. Tondiet lii eromâš tehálâš toollâđ vajesaavâ já hemâdem kukken. Juáhháá naavcah annojeh. Sämmilijn lii vuoigâdvuotâ tubdâđ, ete sij láá tuhhiittum já kuáskuliih ohtsâškoddeest.

Tai sanijguin mun tuáivuttâm puohháid tuođâi pyere sämmilij aalmugpeeivi! Buori sámi álbmotbeaivvi buohkaide! Šiõǥǥ saaʹmi meersažpeiʹvv pukid!

------------

Anna-Maja Henriksson, riehtiminister
 

Back to top