Ministeriija

Vuoigatvuođaministeriija bajásdoallá ja gárgeha riekteortnega ja riektedorvvu, váfista demokratiija struktuvrraid ja dorvvasta riikkavuložiid vuođđorivttiid. Ministeriijas lea ovddasvástádus guovddášlaš riekteortnegiid doalaheaddji lágaid válmmastallamis ja riektelágádusa doaibmannávccas. Duopmováldi gullá sorjjasmeahttun duopmostuoluide.

Vuoigatvuođaministeriijai gullá politihkalaš ovddasvástádus ministeriija ja dan hálddahussuorggi doaimmas.

Vuoigatvuođaministeriija hálddahussuorgi lea viiddis. Ministeriija stivre hálddahussuorggis virgedoaimmahagaid ja lágádusaid doaimma ja čuovvu daid ahtanuššama.

Barggut

Vuoigatvuođaministeriija barggut leat meroštallojuvvon stáhtaráđi ásahusas Vuoigatvuođaministeriijas. Oasi bargguin dikšot hálddahussuorggi virgedoaimmahagat ja lágádusat. Barggut leat:

  • láhkaválmmastallan vuođđoláhkarievtti, almmolaš hálddahusrievtti, priváhtarievtti sihke rihkus- ja proseassarievtti suorggis, sihke eará láhkaásahanbarggut, mat eai gula nuppi ministeriija doaibmasuorgái
  • stáhtaráđi láhkaválmmaštallama gárgeheapmi ja EU-vuoigatvuođalaš neavvun
  • duopmostuolut, riektegeavvanmeannudeapmi ja vuoigatvuođalaš juogadeapmi
  • riekteveahkki ja almmolaš ášševuoddjisearvi
  • ekonomiija- ja vealgeneavvun
  • almmolaš ávkebearráigeahčču
  • sivaheaddjidoaibma
  • bággobearrandoaibma ja konkursabesiid hálddahusa bearráigeahčču
  • sáhkkoráŋggáštusaid, servodatčuovvumušaid ja fáŋgaráŋggáštusaid ollašuhttin
  • rihkusdustema ja eará kriminálapolitihka oppalaš plánen
  • rihkkosa gillájeddjiid sajádaga ovddideapmi, juos ášši ii gula nuppi ministeriija doaibmasuorgái
  • rihkusregisttar ja eará riekteregistarat
  • árpmihanáššit
  • náittoslihttuvuoigatvuođalaš ohcamušat
  • riikkaidgaskasaš riektedikšun, jos ášši ii gula nuppi ministeriija doaibmasuorgái
  • vuoigatvuođakánslera virgedoaimmahat earret dan ekonomiijahálddahus 
  • stáhtalaš válggat, gieldaválggat ja álbmotjienasteamit sihke riikkavulošváikkuheami ovddideapmi 
  • bellodatregisttar sihke bellodagaid ruhtadoalu ja váriid geavahusa dárkkisteapmi
  • giellalága ollašuhttima čuovvun
  • Suoma seađusčoakkáldat
  • bárttiid dutkkadeapmi
  • Ålándda eanangotti iešstivren
  • sápmelaččaid kulturiešstivrejupmi ja sámi áššiid oktiisoabaheapmi
  • Haaga riikkaidgaskasaš priváhtavuoigatvuođa konfereansa
  • ovttaveardásašvuohta ja buriid etnihkalaš gaskavuođaid ovddideapmi.