Hyppää sisältöön
Media

Gollegiella – Davviriikalaš sámi giellabálkkašupmi julevsámegiela ja gielddasámegiela ovddideapmin

Vuoigatvuođaministeriija
Julkaisuajankohta 26.11.2018 15.29
Dieđáhus
Monica Mæland, Karin Tuolja, Solvår Knutsen Turi

Karin Tuolja Johkamohkis Ruoŧas ja Jekaterina Mechkina Murmánskkas Ruoššas oažžuba davviriikalaš sámi giellabálkkašumi jagi 2018.

Gollegiella – Davviriikalaš giellabálkkašupmi juhkkojuvvo Karin Tuoljai Norgga, Ruoŧa ja Suoma sámeáššiin vástidan ministariid ja sámedikkiid sátnejođiheaddjiid čoahkkima oktavuođas Oslos 26.11. ja Jekaterina Mechkinai Murmánskkas 29.11. Giellabálkkašumi mihttomearri lea veahkehit sámegielaid nannemii, ovddideapmái ja seailumii Norggas, Ruoŧas, Suomas ja Ruoššas.

Karin Tuolja lea bargan julevsámegiela ovdii Ruoŧas olles rávis olbmo agis áigge. Son lea doaibman oahpaheaddjin, jorgaleaddjin, oahppomateriála ovddideaddjin ja gielladárkkisteaddjin. Tuolja lea dehálaš olmmoš julevsámegiela giellaservošis, ja sus leamašan guovddáš mearkkašupmi Norgga ja Ruoŧa giellaovttasbarggus, eandalii sátnevuorkkáid ja tearpmaid ovddideamis ja Biibbala jorgaleamis.

Jekaterina Mechkina oažžu Gollegiella-giellabálkkašumi guhkesáigásaš barggus gielddasámegiela sajádaga nannemis Ruoššas. Son lea oassálastán sátnevuorkká ovddideapmái ja gielddasámegiela sátnegirjji gárvvisteapmái. Mechkina lea čállán ja jorgalan girjjiid ja ovddidan oahppamateriála. Su dujiid bokte máŋggat leat oahpásmuvvan Murmánskka guovllu gielddasápmelaččaid eallimii ja kultuvrii.

Giellabálkkašupmi mieđihuvvo ovttaskas olbmui dahje servošii, geat leat ánssolaččat doaibman čielgasit sámegiela ovddideami beales. Bálkkašupmi juhkkojuvvo dál gávccát geardde. Čuovvovaš bálkkašupmi juhkkojuvvo jagi 2020 go Suopma doaibmá golmma riikka sámeáššiid ovttasbarggu sátnejođiheaddjin.

Bálkkašupmelávdegoddái gullet Neeta Jääskö Suomas, David Kroik Ruoŧas, Nina Afanasieva Ruoššas, Solvår Knutsen Turi ja Jane Juuso Norggas.

Lassidieđut:

Ráđđádalli virgeolmmoš Johanna Hautakorpi, vuoigatvuođaministeriija, tel. 02951 50018, [email protected]
Bálkkašupmelávdegotti lahtu Neeta Jääskö Suoma sámedikkis, tel. 0405969230, [email protected]

Kollekielâ – Tave-eennâmlâš säämi kielâpalhâšume juulevsämikielâ ja kieldâsämikielâ ovdedeijeid

Gollegiella –Tâʹvvjânnamlaž sääʹm ǩiõllcistt juuʹlevsääʹm da ǩiʹlddsääʹm ooudâsviikkjid

Back to top