EU-vaal pâʹsspeeiʹv 9.6.2024

Europarlameʹnttvaal leʹbe EU-vaal tååimtet Lääʹddjânnmest pâʹsspeeiʹv 9.6.2024. Vaalin vaʹlljeet Lääʹddjânnmest Euroopp parlamentta 15 vuäzzla viiđ eeǥǥas. Eeʹttǩeeʹj liâ vuäzzliʹžžen veeʹzz jânnmest.

Ouddjiõnstummuš riâžžât Lääʹddjânnmest 29.5.−4.6.2024 da ålggjânnmin 29.5.−1.6.2024. 

EU vaali vaalpeiʹvven jiõnnvuõiggâdvuõttneǩ vuäitt jiõnsted tåʹlǩ tõn jiõnstempääiʹǩest, kååʹtt lååkk tuu jiõnnvuõiggâdvuõttiʹlmmtõõzzâst. Ooudbeäʹlnn vuäitt jiõnsted koʹst täättas õõlmâs ouddjiõnstempääiʹǩest. 

Jiõnnvuõiggâdvuõtt EU-vaalin

EU-vaalin jiõnnvuõiggâdvuõtt lij juâkksast Lääʹdd meerlast leʹbe Lääʹddjânnmest jälsteei da jiõnnvuõiggâdvuõttrekisteera iʹlmmtõõttâm EU-meerlast, kååʹtt lij tiuddâm 18 eeʹǩǩed mââimõõzzâst 9.6.2024. Jiõnnvuõiggâdvuõttneǩ vuäǯǯ jiõnsted tåʹlǩ õõutâst EU vuäzzlažriikkâst: juʹna dommriikkâst leʹbe tõʹst riikkâst, koʹst jäälast. Puõʹtti vaalin liâ jiõnnvuõiggâdvuõttneeʹǩǩ Lääʹddjânnmest nuʹt-aa 4,5 miljoon.

Digi- da meerteâttkoontâr vuõlttad iʹlmmtõõzz jiõnstemvuõiggâdvuõđâst jiõnnvuõiggâdvuõttniiʹǩǩid mââimõõzzâst 16.5.2024.

Juʹn pâʹjjel miljoon jiõnsteeʹj vuäǯǯa jiõnnvuõiggâdvuõttiʹlmmtõõzz Suomi.fi-kääzzkõʹsse

Jiõnnvuõiggâdvuõttiʹlmmtõõzz vuõltteet juʹna pååʹšt mieʹldd leʹbe liâdǥlânji jiõnnvuõiggâdvuõttneeʹǩǩ jiijjâs iʹlmmtõõzz mieʹldd. Neelljadvueʹss jiõnstemvuõiggâdvuõttniiʹǩǩin lij tiʹllʼjam veʹrǧǧneǩteâđtõõzzid liâdǥlânji da iʹlmmtõs jiõnnvuõiggâdvuõđâst vuõltteet siʹjjid Suomi.fi-saaǥǥid. Suomi.fi-saaǥǥid puättam iʹlmmtõõzz vuäitt lookkâd tobdstõõđeeʹl Suomi.fi-neʹttkääzzkõʹsse leʹbe vääʹldeeʹl ââʹnnma Suomi.fi-mobiilsuåvldõõzz.

Eeʹttǩeeʹj

Heʹlssen vaalvuʹvddluʹvddkåʹdd raavad EU-vaali eeʹttǩeeʹjjšiõttʼtõõllmõõžž 10.5.2024, mõõn mâŋŋa vuäzzla da sij eeʹttǩeeʹjjnââmar käunnʼje vuõiggâdvuõttministeria teâtt- da puäđõskääzzkõõzzâst. Eeʹttǩeeʹj liâ vuäzzliʹžžen veeʹzz jânnmest.

Persoonvuõđ tuõđštummuš jiõnstempääiʹǩest

Jiõnsteeʹjest feʹrttai čuäʹjted čiõlǥtõs persoonvuõđstes jiõnstempääiʹǩest. Persoonvuõđ vuäitt tuõđšted veerǥlaž snimldõõǥǥ õõʹnni äʹššǩiiʹrjin, mâta vuejjamkoortin leʹbe pååʹles miõttmin persoonkoortin da paassin.

Ouddjiõnstummuš dommjânnmest da ålggjânnmin

Jiõnnvuõiggâdvuõttneǩ vuäitt jiõnsted ooudbeäʹlnn koʹst täättas õõlmâs ouddjiõnstempääiʹǩest dommjânnmest leʹbe ålggjânnmin.

Dommjânnam da ålggjânnam ouddjiõnstempaaiʹǩi addrõõzz da äävaiåårramääiʹj käunnʼje vuõiggâdvuõttministeria teâtt- da puäđõskääzzkõõzzâst.

Vuõiggâdvuõttministeria määusteʹmes teʹlfonkääzzkõõzzâst vuäitt kõõččâd EU-vaali ouddjiõnstempaaiʹǩin da jiõnstummšest. Teʹlfonkääzzkõõzz õhttvuõđteâđ liâ: 

• lääʹddǩiõllsaž kääzzkõs nââmrest 0800 9 4770
• ruõccǩiõllsaž kääzzkõs nââmrest 0800 9 4771
• WhatsApp-saakk-kääzzkõs nââmrest 050 438 8730.

Ooumaž, koon pâstlvažvuõtt liikkeed da toiʹmmjed lij nuʹt ǩeäppnam, što son ij piâzz mååžnteʹmes vaiggâdvuõđitaa jiõnstempäikka, vuäitt jiõnsted ooudbeäʹlnn jiijjâs dååma. Dommjiõnstummša âlgg iʹlmmtõõttâd jiijjâs kååʹdd väʹlddvaal-luʹvddkådda mââimõõzzâst mââibaarǥ 28.5.2024 ouddâl čiâss 16. 

Ålggjânnmin veeʹzz ouddjiõnstemääiʹjpoodd da vaalpeeiʹv jälsteei leʹbe toʹben ååreei oummu vueiʹtte jiõnsted ǩeʹrjjpååʹštin ålggjânnmin. Jiõnnvuõiggâdvuõttneeʹǩǩ, kååʹtt haaʹlad jiõnsted ǩiiʹrjin, âlgg tiʹllʼjed ǩeʹrjj-jiõnstemäʹššǩeeʹrj ooudbeäʹlnn ålggjânnmid, tõid vuäǯǯeen jiõnast da pååʹštad jiõnâs Lääʹddjânnma jiijjâs kååʹdd väʹlddvaal-luʹvddkådda. Ǩeʹrjj-jiõn âlgg leeʹd kuåsttâm vuõigg väʹlddvaal-luʹvddkååʹddest mââimõõzzâst piâtnâc 7.6.2024 ouddâl čiâss 19. Tääʹrǩab vuäppõõzz käunnʼje addrõõzzâst www.vaalit.fi/kirjeaanestys

Jiõnstummuš vaalpeiʹvven 9. ǩieʹssmannust

Vaalpeiʹvven puk jiõnstempääiʹǩ liâ äävai čiâss 9–20. Vaalpeiʹvven vuäǯǯ jiõnsted tåʹlǩ jiõnnvuõiggâdvuõttiʹlmmtõʹsse miõrkkum jiõnstempääiʹǩest. Jiiʹjjes vaalpeeiʹv jiõnstempääiʹǩ vuäitt ooccâd še addrõõzz vuâđald DVV jiõnstempäiʹǩǩ-kääzzkõõzzâst addrõõzzâst www.aanestyspaikat.fi. Kääzzkõs ävvan vueʹssmannu peäʹlräjja mõõneeʹst.

Puäđõõzz laʹsǩǩummuš

Ouddjiõni laʹsǩǩummuš altteet juʹn vaalpeeiʹv jiõnstummuž ååreen jååttmõõžžâst. Vaalpeeiʹv jiõni vuâđđeei laʹsǩǩummuš altteet tâʹlskani vaalkueʹrnci ǩidd mõõneen. Laʹsǩǩummuž kuõskki vuâđđeei teâđaid õlmstââʹttet vaaljeäʹǩǩää čiâss 20 ääʹljeeʹl, täʹl ouddjiõni laʹsǩǩummuž õõlǥči juʹn leeʹd vaalmâš. Vaali vuâđđeei puäđõõzz valmštâʹvve tõn jeäʹǩǩää da iin poodd. 

Taʹrǩstemlaʹsǩǩummuš spraavât vaalvuʹvddluʹvddkooʹddin vaalpeeiʹv puõʹtti vuõssarggân 10.6. Heʹlssen vaalvuʹvddluʹvddkåʹdd raavad vaali veeʹzz jânnam puäđõõzz da ǩeeʹrjat vaʹlljum vuäzzlaid väʹlddǩiiʹrjid seärad 12.6.

Euroopp parlameeʹnt ođđ toiʹmmjempââʹjj älgg veerǥlânji mââibaarǥ 16.7.2024. Eiʹddevâʹlljmm parlameeʹnt vuäzzla noorâʹtte tâʹl riâššõõttâmsåbbra Strasbourgâst, koʹst vaʹlljeet saakkooumaž, 14 väärrsaakkoummu da vitt kvestoor.

Lââʹssteâđ:
spesiaaläʹšštobddi Laura Nurminen, teʹl. 02951 50008, [email protected] 
spesiaaläʹšštobddi Elina Rissanen, teʹl. 02951 50248, [email protected]
vaaljååʹđteeʹjj Arto Jääskeläinen, teʹl. 02951 50128, [email protected]

Teâđ da puäđõõzz vuõiggâdvuõttministeria teâtt- da puäđõskääzzkõõzzâst

• Ouddjiõnstempääiʹǩ da tõi äävaiåårramääiʹj
• Eeʹttǩeeʹj da eeʹttǩeeʹjjnââmar (10.5.)
• Ooudbeäʹlnn jiõnstem oummui meäʹr (peeiʹvtet õõut čiâss kõõskin, še neäʹttel-looppâst) 
• Vuâđđeei laʹsǩǩummuš ouddnummuš vaaljeäʹǩǩää poodd 
• Raavuum puäđõõzz taʹrǩstemlaʹsǩǩummuž valmštõõđeen seärad 12.6.

Teâđ EU-vaalin da jiõnstummšest www.vaalit.fi 
Vaalit.fi Facebookâst www.facebook.com/vaalit.fi
EU-vaalseiddõs: https://elections.europa.eu/fi 
Teâttpaʹǩat vaalin tååimteeʹjid: https://www.europarl.europa.eu/news/fi/press-room/press-tool-kit

Teâđtõs lij tivvum 8.5. čiâss 16.10. Teâđtõstekstta lij lââzztum, što DVV jiõnstempäiʹǩǩ-kääzzkõs ävvan vueʹssmannu peäʹlräjja mõõneeʹst.