Ministtar Henriksson: Ođđa sámediggeláhka livččii dárbbahuvvon, bargu sápmelaččaid rivttiid dorvvasteami várás joatkahuvvá
- Lean sakkamusat behtton, ahte sámediggelága ođasteapmi ii lihkostuvvan dán ráđđehusáigodagas. Láhkarievdadus livččii leamaš vealtameahttun sápmelaččaid vuođđo- ja olmmošrivttiid dievasmearálaš dorvvasteami várás, deattuha riekteministtar Anna-Maja Henriksson.
Riikkabeivviid vuođđoláhkaváljagoddi ilmmuhii odne, ahte dat ii atte smiehttamuša lágas. Geavadis ráđđehusa ovdanbuktojupmi sámediggelága ođasteamis máhccá.
- Sápmelaččaid iešmearridanrievtti váfisteapmi lea álgovurrosaččat dehálaš. Suoma láhkaásaheapmi lea dálá dilis ruossalas riikkaidgaskasaš olmmošrivttiiguin. Mii eat sáhte joatkit dilis, mas Suopma geažos áigge rihkku sápmelaččaid rivttiid. Bargu sápmelaččaid rivttiid dievasmearálaš ollahuhttima várás joatkahuvvá, ministtar Henriksson dadjá.
Suoma vuođđolága mielde sápmelaččain lea ruovttuguovllusteaset iešstivren, mii guoská giela ja kultuvrra. Sámediggi ovddasta sápmelaččaid áššiin, mat gullet dan bargguide. Dáláš sámediggeláhka lea jagi 1995 rájes ja dat lea earret eará válganjuolggadusaid oasil boarásnuvvan. Suopma lea maid ožžon moaitámušaid sápmelaččaid siviila- ja politihkalaš rivttiid rihkkumis orgánain, mat bearráigehččet ON olmmošriektesoahpamušaid.
Minister Henriksson: Ođđ sääʹmteʹǧǧlääʹǩǩ leʹčči taarbšum, tuâjj säʹmmlai vuõiggâdvuõđi tuõrvvâm diõtt juätkkai
Lassidieđut:
kansliijahoavda Pekka Timonen, oktavuođa váldimat: hálddahuslaš veahkki Paula Kattelus, t. 0295 150 272, [email protected]
stáhtačálli Mikaela Nylander, t. 0295 150 110, [email protected]