Rihkusvuoigatvuođalaš meannudeapmi

Rihkusášši gieđahallamis leat máŋga muttu, ovdamearkka dihte ovdadutkamat, sivahanguorahallan ja diggi. Boles ja eará ovdadutkaneiseváldi (rádjebearráigeahčču, duollu) galgá doaimmahit ovdadutkamiid, go dasa dahkkon almmuhusa vuođul dehe muđuid lea ágga eahpidit, ahte rihkus lea dáhpáhuvvan. 

Ovdadutkamat doaimmahuvvojit ovdadutkaneiseválddiid ja sivaheaddji ovttasbargun. Sivaheaddji bargun lea dasa lassin fuolahit rihkusvuoigatvuođalaš ovddasvástádusa ollašuvvamis rihkusášši gieđahallamis, sivahanguorahallamis ja dikkis áššeosolaččaid riektedorvvu ja almmolaš ovddu gáibidan vuogi mielde. Ovdadutkamiid gárvvásnuvadettiin das čoggon materiála doaimmahuvvo sivaheaddjái, gii mearrida sivahanguorahallamis, čuoččáldahttojuvvogo ášši vai dahkkojuvvogo sivakeahttaguođđinmearrádus.

Jos sivaheaddji mearrida čuoččáldahttit ášši, son johttáha ášši diggerievttis. Diggerievtti gieđahallamis sivaheaddji ovdanbuktá áššáskuhttima ja áššáskuhtton dehege vástideaddji vástida dasa. Sivaheaddji galgá čájehit áššáskuhttima duohtan. Čájáhussan sivaheaddji ja áššáskuhtton sáhttiba ovdamearkka dihte gullat duođašteddjiid ja ovdanbuktit čálalaš duođaštusaid. Gieđahallan sáhttá muhtin dáhpáhusain leat čálalaš. Jos dahkki lea dovddastan rihkkosa, sáhttá ášši lágas mearriduvvon eavttuid mielde gieđahallot sivaheaddji duopmoovdanbuktojumi vuođul dovddastanriektegeavvamis. Duopmostuollogieđahallama maŋimus muddun lea duomu addin. Jos duomus váidojuvvo, de ášši gieđahallojuvvo hoavvarievttis njuolggadusaid mielde, mat dan gusket.  

Rihkusproseassa galgá deavdit vuoiggalaš riektegeavvama gáibádusaid. Ášši vástideaddji, gii lea ráŋggáštusgáibádusa čuozáhahkan, seamma ládje go áššeoamasteaddji, riektedorvvu ollahuvvan lea earenoamáš dehálaš. Láhkaatnima ulbmiliidda gullá maid áššiid gieđahallama ábasvuohta ja rihkusproseassa goluid govttolašvuohta.

Beaktilvuođa ja goasttádusa oaidnivuohkái laktása vejolašvuohta summáralaš sáhkkomeannudeami atnimii rihkkumušain.

Sáhku ja meaddinsáhtu ollahuhttimis atná ávvira Riekteregisttarguovddáš.

Giddagasráŋggáštusaid ja servodatčuovvumušaid ollahuhttima ovddasvástádus lea Rihkusčuovvumušlágádusas.