Hyppää sisältöön
Media

Vuođđo- ja olmmošrivttiid čuovvun váfistuvvo indikáhtoriiguin

Vuoigatvuođaministeriija
Julkaisuajankohta 24.6.2021 11.56
Dieđáhus

Stáhtáráđđi váfistii ikte prinsihppamearrádussanis goalmmát álbmotlaš vuođđo- ja olmmošriektedoaibmaprográmma sisdoalu. Doaibmaprográmma oassin leat gárgehuvvon vuođđo- ja olmmošriekteindikáhtorat, maid mielde sáhttá dás maŋás buvttadit systemáhtalaš dieđu das, mot vuoigatvuođat ollašuvvet olbmuid árgabeaivvis.

Goalmmát álbmotlaš vuođđo- ja olmmošriektedoaibmaprográmma gárgehuvvo vuoigatvuođaid ollašuvvama čuovvun Suomas ja váfistuvvo vuođđo- ja olmmošriektegažaldagain mearrádusdahkan, mii vuođđuduvvá dihtui. 

- Lea dehálaš, ahte vuođđorivttiid ollašuvvamis olbmuid árgabeaivvis ožžojuvvo jeavddalaččat diehtu, vai čuolbmasajiide sáhttá seahkánit áhpasit, gávnnaha vuoigatvuođaministtar Anna-Maja Henriksson.

Vuoigatvuođaid čuovvun buoriduvvo vuođđo- ja olmmošriekteindikáhtoriid lassin nu ahte ovddiduvvo dutkamuš ja -diehtočoaggin, čuvvojuvvojit ovddeža áhpaseappot riikkaidgaskasaš soahpamušaid bearráigeahččoorgánaid ávžžuhusat ja daid ollašuhttin sihke gárgehuvvo vuođđo- ja olmmošriekteváikkuhusaid árvvoštallan láhkaválmmastallamis. 

Vuođđo- ja olmmošriekteindikáhtorat govvidit vuoigatvuođaid ollašuvvama árgabeaivvis 

Vuođđo- ja olmmošrivttiid indikáhtormálle čađačuohppi prinsihppan lea ovttaveardásašvuohta. Čuovvunčuozáhagat ja daid indikáhtorat leat juogustuvvon ovcci eallinsuorgái: 

  • persovnnalaš friddjavuohta, duohtatmeahttunvuohta ja vuoigatvuohta eallimii 
  • riektedorvu ja buorre hálddahus 
  • priváhta eallin ja bearašeallin 
  • sátne-, oaivil,- oskku- ja vuođđooaidnofriddjavuohta 
  • giella ja kultuvra 
  • searvevuohta ja váikkuheapmi 
  • birgenláhki ja olmmošárvosaš bargu  
  • čuvgehus ja skuvlen 
  • dearvvašvuohta, buresbirgejupmi ja biras. 

Indikáhtoriid válmmastallanproseassa lea leamaš rabas ja vuorrováikkuhuslaš. Loahpalaš válljemat vuođđuduvvet earret eará riikkaidgaskasaš soahpamušaid bearráigeahččoorgánaid ávžžuhusaide, lágalašvuođa bearráigehččiid áiccastagaide, vuođđoláhkaváljagotti cealkámušaide sihke gullamiin ja áššedovdijoavkku ságastallamiin ovdan boahtán gažaldagaide. 

Suoma vuođđo- ja olmmošriektečuovvun galgá gárgehuvvot 

Riikkabeivviid vuođđoláhkaváljagoddi, álbmotlaš soahpamušaid bearráigeahččoorgánat ja ovddit sorjjasmeahttun árvvoštallamat leat deattuhan dárbbu gárgehit álbmotlaš vuođđo- ja olmmošriektečuovvuma sihke -diehtočoaggima. Vuođđoláhkaváljagoddi lea dasa lassin atnán dárbbašlažžan, ahte doaibmaprográmma ráhkaduvvo juohke ráđđehusbajis. 

Diehtovuđđosaš politihka dahkan lea okta oaiveministtar Sanna Marina ráđđehusa lohpádusain politihka ođasnuhttima várás. 

Lassidieđut:
ráđđádalli virgeolmmoš Anna Saarela, t. 0295 150 106, [email protected]

Back to top