Guovlluválggat 23.1.2022
![Vaalit. Val.](/documents/1410853/98645412/Vaalit_logokuva.jpg/01c0bdb3-f97d-77ed-312a-a1ba73286031?t=1715588870088&width=1200)
Suoma vuosttaš guovlluválggat lágiduvvojit sotnabeaivve 23.1.2022. Válggain válljejuvvojit guovllustivrrat 21 buresbirgenguvlui. Guovllustivrraid doaibmaáigodat álgá 1.3.2022 ja nohká 31.5.2025.
Ovdajienastanáigi lea ruovttueatnamis 12.-18.1.2022 ja olgoriikkain 12.-15.1.2022.
Máŋggain olgoriikkaid ovdajienastanbáikkiin jienastanáigemearri lea dán oanehit.
Guovlluválggain sáhttá jienastit iežas buresbirgenguovllu evttohasaid. Helssetlaččat eai jienas guovlluválggain, daningo Helssegis sosiála- ja dearvvašvuohtabálvalusaid sihke gádjundoaimma ordnema ovddasvástádus gullá dás maŋásge gávpogii iige Helsset ráhkat buresbirgenguovllu.
Dán rádjái sosiála- ja dearvvašvuođa fuolahusa sihke gádjundoaimma ordnen lea leamaš gielddaid ovddasvástádussan. Dás maŋás daid ovddasvástádus gullá buresbirgenguovlluide. Buresbirgenguovllus lea iešstivren, ja alimus mearridanválddi guovllu áššiin geavaha guovllustivra.
Evttohasohcamušat guđđojuvvojit 14.12. d. 16 rádjái
Evttohasohcamušat guđđojuvvojit guovllu válgalávdegottiide 14.12. d. 16 rádjái. Guovllu válgalávdegottit dárkkistit ohcamušaid ja váfistit evttohasásaheami 23.12. Evttohasaid dieđut ja evttohasnummárat almmustahttojuvvojit vaalit.fi-siidduin 23.12. eahkes.
Koronaepidemiijadili gárggiideapmi váldojuvvo vuhtii válgaordnedemiin
Guovlluválggat lágiduvvojit ođđajagimánu 2022 epidemiijadili gáibidan ortnegiid mielde. Vuoigatvuođaministeriija ja Dearvvašvuođa ja buresbirgejumi lágádus (DBL) váldet guovlluválggaid ordnedemiin vuhtii epidemiijadili gárggiideami. DBL oainnu mielde jienasteapmi lea doaibma, mas lea unnán riska.
Vuoigatvuođaministeriija ja DBL leat ovttasráđiid ráhkadan rávvagiid válgaeiseválddiide válggaid lágideamis koronaáigge. Dárbbu mielde doahttaluvvojit báikkálaš dearvvašvuođa eiseválddiid addin dárkilit rávvagat.
Vaalit.fi-siidduin gávdnojit jienasteddjiide rávvagat jienasteami dearvvašvuođa dorvvolašvuođas koronaáigge. Muohtomáskka ja giehtadesi atnu lea dehálaš seamma ládje go doarvái guhkes gaskka guođđin earáide jienastettiin. Válgavirgeolbmot atnet ávvira dorvvolašvuođas jienastanbáikkis ja nevvot rávvagiid doahttaleamis.
Jienasteaddjit sáhttet jearrat rávvagiid sierraortnegiin iežaset gieldda guovddášválgalávdegottis.
Ilmmuhusat jienastanvuoigatvuođas sáddejuvvojit juovlamánu áigge
Jietnavuoiggalaš olbmot ožžot Digi- ja álbmotdiehtovirgelágádusas ilmmuhusa jienastanvuoigatvuođas. Dan čuovusin lea logahallan jietnavuoiggalaš olbmo lagasguovllu ovdajienastanbáikkiin ja diehtu buresbirgenguovlluid bargguin.
Ilmmuhusat jienastanvuoigatvuođas sáddejuvvojit boastta mielde maŋemusat 30.12.2021. Juos jietnavuoiggalaš lea ilmmuhan iežas váldit vuostá eiseváldedieđáhusaid elektrovnnalaččat, ilmmuhus sáddejuvvo Suomi.fi-bálvalussii.
Jienastanbáikki ja iežas buresbirgenguovllu lea álki čilget
Logahallan ovdajienastanbáikkiin gávdno vuoigatvuođaministeriija vaalit.fi-siidduin. Guovlluválggaid válgabeaivvi 23.1.2022 sáhttá jienastit dušše dan jienastanbáikkis, mii namuhuvvo jietnavuoiggalažžii sáddejuvvon jienastanvuoigatvuođa ilmmuhusas. Ovdajienastanbáikki sáhttá válljet friddja.
Jienastanbáikkiid čujuhusain ja rabasáiggiin oažžu dieđuid maid nuvttá válgabálvalannummáris. Suomagielalaš telefonbálvalusa nummár lea 0800 9 4770 ja ruoŧagielalaš 0800 9 4771. Válggaid WhatsApp-dieđáhusbálvalusa nummár lea 050 438 8730.
Guovlluválggaid jienastanvuoigatvuohtaregisttar lea čoggojuvvon álbmotdiehtovuogádagas 3.12.2021. Jietnavuoiggalačča orrunbáiki meroštallá, man buresbirgenguovllu evttohasaid son sáhttá jienastit ja man válgabeaivvi jienastanbáikkis son sáhttá jienastit. Juos jietnavuoiggalaš fárre 3.12. maŋŋel, buresbirgenguovlu ja jienastanbáiki mearrahuvvet ovddit orrunbáikki mielde. Jietnavuoiggalaččat leat oba riikkas sulaid 3 933 000.
Diehtu das, man buresbirgenguvlui guđege gielda gullá, gávdno sode-ođasnuhttima fierbmesiidduin čujuhusas (suomagillii).
Válgabohtosiid dieđut almmustuhttojuvvojit válgabeaivve jienaid rehkenastima gárváneami mielde
Válgabeaivvi álgoboađusrehkenastima ovdáneami sáhttá čuovvut fierpmis. Boađusbálvalusas muitaluvvojit evttohasaid oažžun jietnamearit, bellodagaid jietnamearit ja jietnaossodagat buresbirgenguovlluid mielde ja olles riikkas.
Go dárkkistanrehkenastin lea gárvvis, de guovllu válgalávdegottit váfistit válggaid bohtosa gaskavahkku 26.1. maŋemusat diibmu 18 álggahuvvon čoahkkimiin. Váfistuvvon bohtosat beaiváduvvojit vaalit.fi-siidduide 26.1. eahkeda áigge.
Lassidieđut:
ráđđádalli virgeolmmoš Heini Huotarinen, t. 0295 150 127, [email protected]
sierraáššedovdi Laura Nurminen, t. 0295 150 008, ovdanamma. [email protected]
válgahoavda Arto Jääskeläinen, t. 0295 150 128, ovdanamma.j. [email protected]
sierraáššedovdi Elina Siljamäki, t. 0295 150 248, ovdanamma. [email protected]
Buresbirgenguovllut ja daidda gullevaš gielddat (suomagillii)
Vaalit.fi: Diehtu válggain ja jienasteamis
Koronarávvagat jienasteddjiide guovlluválggain
Dearvvašvuođa ja buresbirgejumi lágádus: Áigeguovdil koronavirusdilis (suomagillii)
Vaalit.fi Twitteris
Vaalit.fi Facebookas
Vaalivideot YouTubes
Válggaid telefonbálvalus suomagillii 0800 9 4770 ja ruoŧagillii 0800 9 4771
Válggaid WhatsApp-dieđáhusbálvalus 050 438 8730