Ministtar Henriksson ministariid ja sámedikkiid ságadolliid deaivvadeamis Ruoŧas
Riekteministtar Anna-Maja Henriksson searvvai odne sámi áššiid ovddasvástideaddji ministariid ja sámedikkiid ságadolliid čoakkámii Stockholmmas. Deaivvadeami fáddán ledje earret eará davviriikkalaš sámi soahpamuš sihke vaššisáhka ja rasisma, mii čuohcá sápmelaččaide.
- Mii leat ovttaoaivilis das, ahte lea dehálaš joatkit barggu davviriikkalaš sámi soahpamuša áigái oažžuma várás. Vaššisáhka, mii čuohcá sápmelaččaide, lea dađibahábut maid áigeguovdilis fáddá. Suomas sámediggelágas guhká bistán eahpesealvves dilli lea leamaš váttis earenoamážit sámi nuoraide. Mis lea iešguorahallama báiki, juos máŋggat nuorat muosáhit láhkaođasteamis gevvon ságastallama measta traumáhtalažžan. Lea earenoamáš dehálaš, ahte riikkabeaivvit dohkkeha dál sámediggelága, dadjá riekteministtar Anna-Maja Henriksson.
Henrikssona lassin Stockholmmas ordnejuvvon čoakkámii serve sámi áššiin ovddasvástideaddji ministariijain Ruoŧa kulturministtar Parisa Liljestrand ja Norgga gieldda- ja guovlluministariija stáhtačálli Nancy Charlotte Porsanger Anti sihke sámedikkiin ságadoalli Silje Karine Muotka Norggas, II várreságadoalli Leo Aikio Suomas sihke Sámedikki stivrra sadjásaš ságadoalli Stefan Mikaelsson Ruoŧas.
Deaivvadeamis ságastallojuvvui maid earret eará sámegielalaš sisdoaluid oažžasuvvamis digitálalaš vuuolážiin sihke dálkkádatrievdama váikkuhusain árktalaš guovlluin.
- Árktalaš guovllu álbmot ja earenoamážit eamiálbmogat muosáhit vuosttažin dálkkádatrievdama váikkuhusaid. Čoakkámis deattuhuvvui diehtolonohallama mearkkašupmi sierra stáhtaid gaskkas sihke loktejuvvui ovdan dálkkádatdoaimmaid váikkuhusaid árvvoštallama dehálašvuohta jur sámi guovlluin, Henriksson lasiha.
Dilálašvuođas juhkkojuvvui dasa lassin davviriikkalaš Sámi giellabálkkašupmi Gollegiella. Bálkkašumi oaččui sápmelaš gielladutki ja politihkar Ole Henrik Magga Norgga Guovdageainnus. Bálkkašupmi juhkkojuvvui dán jagi logat háve mearkkašahtti árjjas sámegiela ovddideapmái.
Sámi áššiid oktiiheiveheamis Suomas, Ruoŧas ja Norggas ovddasvástideaddji ministarat ja dáid riikkaid sámedikki ságadoallit leat jagi 2000 rájes čoahkkanan jeavddalaččat oktasaš čoakkámii gieđahallat dakkár sámi áššiid, main riikkain lea oktasaš beroštupmi. Čoakkámiid válmmastallan gullá davviriikkalaš sámi áššiid virgeolmmošorgána bargguide. Davviriikkalaš sámi áššiid ovttasbarggu ságadoallivuohta sirdása dán čoakkámis Supmii jahkái 2023.
Lassidieđut:
ráđđádalli virgeolmmoš Elina Vaara, t. 050 479 2721, [email protected]
stáhtačálli Mikaela Nylander, t. 0295 150 110, [email protected]
Loga lasi Gollegiella-giellabálkkašumis
om.fi/sami-assit
Vinnare av Nordiskt samiskt språkpris - Gollegiella
Minister Henriksson ministerij já sämitiigij saavâjođetteijei teivâdmist Ruotâst
Minister Henriksson ministeeʹri da Sääʹmtiiʹǧǧi saaǥǥjååʹđteeʹji kaaunõõttmõõžžâst Ruõccâst