EU-vaaljah pasepeeivi 9.6.2024

Europarlamentvaaljah ađai EU-vaaljah toimâttuvvojeh Suomâst pasepeeivi 9.6.2024. Vaaljâin väljejuvvojeh Suomâst Euroop parlamentân 15 jesânid viiđâ ive pajan. Iävtukkâsah láá iävtukkâssân oles enâmist.

Munejienâstem uárnejuvvoo Suomâst 29.5.−4.6.2024 já olgoenâmijn 29.5.−1.6.2024.

EU-vaaljâi valjâpeeivi jienâvuoigâdvuođâlâš puáhtá jienâstiđ tuš ton jienâstemsaajeest, mii lohá jienâvuoigâdvuotâalmottâsâst. Muuneeld puáhtá jienâstiđ mon peri almolii munejienâstemsaajeest.

Jienâvuoigâdvuotâ EU-vaaljâin

EU-vaaljâin jienâvuoigâdvuotâ lii Suomâ jyehi aalmugjesânist tâi Suomâst ässee já jienâvuoigâdvuotâregisterân almottâttâm EU-aalmugjesânist, kote lii tiävdám 18 ihheed majemustáá 9.6.2024. Jienâvuoigâdvuođâlâš uážžu jienâstiđ tuš EU oovtâ jeessânstaatâst, jo-uv jieijâs päikkistaatâst tâi ton staatâst, kost sun áásá. Puáttee vaaljâin jienâvuoigâdvuođâliih láá suulân 4,5 miljovnid.

Digi- já aalmugtiätuvirgádâh vuolgât almottâs jienâvuoigâdvuođâst jienâvuoigâdvuođâláid majemustáá 16.5.2024.

Jo paijeel miljovn jienâsteijed finnejeh jienâvuoigâdvuotâalmottâs Suomi.fi-palvâlusân

Jienâvuoigâdvuotâalmottâs vuolgâttuvvoo jo-uv poostâ peht tâi šleđgâlávt jienâvuoigâdvuođâlii jieijâs almottâs mield. Niäljádâs jienâvuoigâdvuođâlijn láá tiilám virgeomâhâštiäđáttâsâid šleđgâlávt já almottâs jienâvuoigâdvuođâst vuolgâttuvvoo sijjân tuš Suomi.fi-viestáid. Suomi.fi-viestáid puáttám almottâsâid puáhtá luuhâđ tubdâttâtmáin Suomi.fi-nettipalvâlusân tâi väldimáin anon Suomi.fi-mobilheiviittâs.

Iävtukkâsah

Helsig valjâpirrâdâhlävdikodde nannee EU-vaaljâi iävtukkâsasâttâllâm 10.5.2024, mon maŋa iävtukkâsah já sii iävtukkâsnumereh kávnojeh riehtiministeriö tiätu- já puáđuspalvâlusâst. Iävtukkâsah láá iävtukkâssân oles enâmist.

Persovnvuođâ tuođâštem jienâstemsaajeest

Jienâsteijee kalga čäittiđ tuođâštus persovnvuođâstis jienâstemsaajeest. Persovnvuođâ puáhtá tuođâštiđ virgálii koválii äššikirjijn, tego vyeijimkorttáin tâi poolis mieđettem persovnkorttáin já passijn.

Munejienâstem päikkienâmist já olgoenâmijn

Jienâvuoigâdvuođâlâš puáhtá jienâstiđ muuneeld mon peri almos munejienâstemsaajeest päikkienâmist tâi olgoenâmijn.

Päikkieennâm já olgoeennâm munejienâstemsoojij čujottâsah já ávusorroomääigih kávnojeh riehtiministeriö tiätu- já puáđuspalvâlusâst.

Riehtiministeriö nuuvtá puhelinpalvâlusâst puáhtá koijâdiđ EU-vaaljâi munejienâstemsoojijn já jienâstmist. Puhelinpalvâlus ohtâvuotâtiäđuh láá: 

• suomâkielâlâš palvâlem numerist 0800 9 4770
• ruotâkielâlâš palvâlem numerist 0800 9 4771
• WhatsApp-viestâpalvâlus numerist 050 438 8730.

Olmooš, kiän naavcah lihâdiđ já toimâđ láá tommittáá raijâšum, ete sun ij peesâ merettes vaigâdvuođâittáá jienâstemsajan, puáhtá jienâstiđ muuneeld jieijâs pääihist. Päikkijienâstmân kalga almottâttâđ jieijâs kieldâ kuávdášvaljâlävdikoodán majemustáá majebaargâ 28.5.2024 ovdil tijme 16. 

Sij, kiäh oroh tâi ääsih olgoenâmijn oles munejienâstemääigi já valjâpeeivi, pyehtih jienâstiđ olgoenâmijn reiváin. Jienâvuoigâdvuođâlâš, kote haalijd jienâstiđ reiváin, kalga tiiláđ reivâjienâstemäššikiirjijd muuneeld olgoenâmáid, jienâstiđ ko lii finnim taid já vuolgâttiđ jienâs poostâ peht Suomân jieijâs kieldâ kuávdášvaljâlävdikoodán. Reivâjienâ kalga leđe rievtis kuávdášvaljâlävdikoddeest majemustáá vástuppeeivi 7.6.2024 ovdil tijme 19. Tärhibeh ravvuuh kávnojeh čujottâsâst www.vaalit.fi/kirjeaanestys

Jienâstem valjâpeeivi kesimáánu 9. peeivi

Valjâpeeivi puoh jienâstemsajeh láá áávus tijme 9-20. Valjâpeeivi uážžu jienâstiđ tuš jienâvuoigâdvuotâalmottâsân merkkejum jienâstemsaajeest. Jieijâs valjâpeeivi jienâstemsaje puáhtá uuccâđ meid čujottâs vuáđuld DAV jienâstemsajepalvâlusâst čujottâsâst www.aanestyspaikat.fi. Palvâlus lekkâs majemustáá vyesimáánu pelimuddoost.

Puátusij rekinistem

Munejienâi rekinistem algâttuvvoo jo, ko valjâpeeivi jienâstem lii joođoost. Valjâpeeivi jienâi rekinistem algâttuvvoo tállân ko valjâvisteh maneh kiddâ. Rekinistmân kyeskee algâtiäđuh almostittojeh valjâeehid tijme 20 rääjist, kuás munejienâi rekinistem lii tárguttâs kiergâttiđ. Vaaljâi algâpuátuseh valmâštuveh eehid já iijâ ääigi. 

Tärhistemrekinistem tahhoo valjâpirrâdâhlävdikuudijn valjâpeeivi čuávvoo vuossaargâ 10.6. Helsig valjâpirrâdâhlävdikodde nannee vaaljâi oles eennâm puátusijd já čáálá väljejum ulmuid väldikiirjijd koskoho 12.6.

Euroop parlament uđđâ toimâpaje álgá virgálávt majebaargâ 16.7.2024. Eidu väljejum parlament jesâneh čokkâneh talle ornijdemčuákkimân Strasbourgist, mast väljejuvvojeh sahâalmai, 14 värisahâalmad já vittâ kvestor.

Lasetiäđuh:
sierânâsäššitobdee Laura Nurminen, p. 02951 50008, ovdânommâ.suhânommâ@gov.fi 
sierânâsäššitobdee Laura Nurminen, p. 02951 50248, ovdânommâ.suhânommâ@gov.fi
valjâhovdâ Arto Jääskeläinen, p. 02951 50128, ovdânommâ.suhânommâ@gov.fi

Tiäđuh já puátuseh riehtiministeriö tiätu- já puáđuspalvâlusâst

• Munejienâstemsajeh já tai ávusorroomääigih
• Iävtukkâsah já iävtukkâsnumereh (10.5.)
• Muuneeld jienâstem ulmui mereh (peividuvvoo tiijme kooskâi, meid oholoopâ) 
• Algârekinistem ovdánem valjâeehid ääigi  
• Nannejum puátuseh, ko tärhistemrekinistem valmâštuvá koskoho 12.6.

Tiäđuh EU-vaaljâin já jienâstmist www.vaalit.fi 
Vaalit.fi Facebookist www.facebook.com/vaalit.fi  
EU-valjâsiijđoh: https://elections.europa.eu/fi 
Tiätupakkeet vaaljâin toimâtteijeid: https://www.europarl.europa.eu/news/fi/press-room/press-tool-kit

Tiäđáttâs lii tivodum 8.5. tme 16.10. Tiäđáttâsteekstân lii lasettum mainâšume tast, ete DAV jienâstemsajepalvâlus lekkâs majemustáá vyesimáánu pelimuddoost.